| Other things |
| Lorem ipsum dolor sit amet, consectetuer adipiscing elit. Duis ligula lorem, consequat eget, tristique nec, auctor quis, purus. Vivamus ut sem. Fusce aliquam nunc vitae purus. |
| Other things |
| Lorem ipsum dolor sit amet, consectetuer adipiscing elit. Duis ligula lorem, consequat eget, tristique nec, auctor quis, purus. Vivamus ut sem. Fusce aliquam nunc vitae purus. |
| Other things |
| Lorem ipsum dolor sit amet, consectetuer adipiscing elit. Duis ligula lorem, consequat eget, tristique nec, auctor quis, purus. Vivamus ut sem. Fusce aliquam nunc vitae purus. |
| Other things |
| Lorem ipsum dolor sit amet, consectetuer adipiscing elit. Duis ligula lorem, consequat eget, tristique nec, auctor quis, purus. Vivamus ut sem. Fusce aliquam nunc vitae purus. |
| Other things |
| Lorem ipsum dolor sit amet, consectetuer adipiscing elit. Duis ligula lorem, consequat eget, tristique nec, auctor quis, purus. Vivamus ut sem. Fusce aliquam nunc vitae purus. |
|
| Professional Education |
| Saturday, September 27, 2008 |
By Zosanglien Zote
(A) THUHMAHRUOI :
Professional Course hang ti hin MBBS/BDS, BE/B. Tech, B. Arch , BSc (Nursing), BVSc, B.Pharm., MBA, Hotel Management le a dang tamtak kawk thei atih. Ei thuziek a sei taluo naw na dingin le a danghai hi ka hrietdan an ril bek naw leiin tuta tuma ding chun MBBS/ BDS le BE/ B.Tech hai hi hang thlur bing deu inla thain ka hriet.
Pawl sawm ei hang zo chie hin a thiem thei deu hlek (2nd Division chin) chun Science hang lak phawt hi a tha in ka hriet. Arts/Commerce lak nghal kha tum feltak neisa chun suol chuong lova ngai inla. Class XII (Sc) eilak ani chun, thildang tamtak hi introduce ta hai sienkhawm, a khawtieng tieng khawm inher thei dinga Subject Combination pali, Physics, Chemistry, Mathematics/Biology le additional ah Mathematics/Biology lak theina ngei School/College a ei inchuka ei lak ngei bawk kha ka la recommend tak tho tho chu anih. Degree level ei hang kai chie a ei inchuk ding ei thlang dan ding kha hril ka nuom tak chu anih.
(B) A THAT LEMNA POINT HAI :
Professional Course , a biktakin MBBS BE etc. hi hieng General Degree eiti BA, BSc, B.Com nekin ei inchuklai haiin uor lem hai sienla a thatna san hai :-
1) A kum thu a hin BA, B.Sc, B.Com (Kum thum) nekin a sawt lem (MBBS – Kum nga le a chanve, BE – Kum li) deu hlekin inlang sienkhawm, tulai naupangin lekha an inchuk in hma taha, Kum 15/16 /17 vela Matric an pass tho chun a sawt bek bek chuong in an lang nawh. Sungkuo harsa deu thangna zawng nuom vat tading lchun BE hi a tha lem el thei.
2) General a graduate degree neihaiin an thaw thei angang an thaw ve thei vawng. (Entirnan : Civil Services - IAS, IFS, IPS etc, Bank Officer, Sipai Officer le a dang dang ah). Ngaidan indiknaw deu eila nei ni a inlang chu : IAS, IFS, IPS hai hi Arts Graduate hai ta ding deuva siena ei nei a, hi hi ei ngaidan ala ni chun ei peihawn a hun tah.
Civil Service Exam eiti chu India ram pumpui a graduate, (ieng line khawm a huom vawng) an exam nuoili/nuoinga lai a inthawk khan mithiem tak tak 300/400 (IAS a zakhat nekin a tlawmlem ta hlak) vel an thlang suok kha ani el a, General Studies Paper (Compulsory) bakah mani Subject ditzawng kha an thlang thei seng anih. Miin MBBS/BE ani khawma History, Geography etc. kha a lak nuom chun lak an phal vawng tho a, tiem deu hlek chu ngai a tih. (Nikum hmasa lai ela Mizo nunghak, MBBS, IAS General Category a inziek tling khan Geography Subject a lak ani kha). MBBS/BE chun a Subject inchuk ngei Medicine, Civil Engineering, Electrical Engineering, Mechanical Engineering, etc hai khawm kha a lak nuom phawt chun an phal vawng tho bawk a. India ram pumpui thu a lem chu Professional graduate hai hi a tling tam tam anni ta lem in an lang. Eini hai laia MBBS/BE inchuk haiin ei dawng rawp hlak chu “Ana, MBBS/BE inchuk a, IAS tieng fe la ka ti lem vei leh” ti hi anih. Inhrilfie vawng khawm thil intak tak anih.
3) Sin thaw hnungah professional degree nei a that lemna ding awm point 4 chauvin hang tarlang inla :- a) Professional graduate ni chun ei sin thawna (entirnan BE(Civil) tadingin – Road/Building design/construction/maintenance le Doctor tadingin – damdawi pek, operation etc) a khan thuneina pumhlum independent angreng takin ei nei a, ei neka Department/Company a inlal lem khawm nihai sienla, hung inrawl vawng remchangnaw chin hi a um leiin Professional Independence/Satisfaction a um lemin an lang.
b) Sin ei thaw a, ei experience deu deu a, ei hlutna ei belsa pei ani leiin tulai Privatisation khawvel, experienced professionals India ram a khawm Company Corporation hran hran in an zawng chur churna khawvel ei hmang mek a lem hin chu, (Mi ban el anta, kan hotu hai lungawinaw zawng ning ata, ti a), hotu hai mitmei veng dawr dawra, ti deka sin thaw kha a um nawh. A suol zawng ni chuong lovin, mani a ngaidan nei a, principle neia, huoi taka sinthaw theina scope a um lemin an lang.
c) Sin pangai thawna bakah, khawpuia lem chu a thiem/taima tading chun Private a inhlawna ding a um zing. Tulai hin Private a Design/Billing/Site engineer le Doctor Private a practice mani sin (abiktakin sawrkar sin) pangngai baka inhlawna hmu zing mi tamtak hril ding an um mek anih.
d) Tulai khawvel a damdawi thiemna an sang pei a, mihriemin fak le dawn ei uluk ta bakah a hun tawk chauva exercise lak dam ei uor ta pei a, Pathien zarin ei dam hun khawm hi a sawt hret hret niin an lang a. Kum 60 a pension la tlangval deu deu khawm ei um tah. Professional graduate hai chun ei nuom zawng zawng a sin thaw kha pension hnungah ei tan thei ding chau niin an lang. An hmaw zuol deu hai, pension nghak pei lo tading khawma Voluntary a suok a, inhlawna ding Company/Corporation zawm amani, mani a practice a fakzawng thei ani bawk.
Chuleiin, Professonal Course inchuk hi ieng ang sin khawm ei thaw zawm tum nisien, hang fe tanna hmasatak a hang hmang phawt hi a thatakin ka hriet.
( C ) COLLEGE A LUT DAN DING :
1) MBBS/BDS : (a) State Quota : Ei umna State seng hin Quota an nei vawnga, khawlai hmuna khawm Class XII (Sc) kha zo inla, Permanent Resident ei nina State Quota kha hni chi anih. State Capital ah Directorate of Higher & Technical Education/Higher Education/Education/Health Services a hai hin ei lut tum kum April/May thla velah ngaiven chi ning atih.
(b) CBSE – AIPMT ( All India Pre–Medical Test ) : India rama Medical College um popo deuthaw a hin Central Government hin 15 % quota a nei vawng a (J&K le Andhra Pradesh thang lovin) ST quota 7.5 % tiemin Seat 1600 vel anih. India mi taphawt exam thei a Entrance hi kumtin CBSE in a buotsai hlaka, SC/ST tadingin PCB (Physics-Chemistry-Biology) a 40% hmu a ngai.
For details please log on to : www.cbse.nic.in.
(c) AIIMS ( All India Institute of Medical Sciences ) Entrance : India rama Medical College thataka ngai a hin kumtin ST quota 7.5 % tiemin MBBS Seat 50 vel chau a um hlak. India mi taphawt exam thei a Entrance hi kumtin Notification December a an insuo hlak a, February thla tawp vel hi Form Submit na ding last date ani hlak. Form man (Exam Fee a thangsa nghal) SC/ST tadingin Rs 400/-. . State khawpui State Bank of India Main Branch a inchawk thei ani hlak.
For details please log on to : www.aiims.edu.
(d) CMC ( Christian Medical College), Vellore : India rama Medical College thapawl taka ngai a hin kumtin ST quota le Christian quota tiemin MBBS Seat 60 vel chau a um hlak. India mi taphawt exam thei a Entrance hi kumtin March chawlkar hmasa tieng a Form an insuo hlak a, April kar hnina vel hi Form Submit na ding last date ani hlak. Form man (Exam Fee a thangsa nghal) Rs 400 vel anih. A Form hi incha a ngai hlak.
For details please log on to : http:// home.cmcvellore .ac.in
(e) AFMC ( Armed Forces Medical College), Pune Entrance : Lut a inthawka Sipai ni tan nghal na Medical College a hin kumtin (ST quota a um nawh) MBBS Seat 130 vel chau a um hlak (Pasal 105 le Nuhmei 25). India mi taphawt exam thei a Entrance hi kumtin Hnina Form, Rs 150 (Exam Fee a thangsa nghal) man vel, hi Head Post Office a hai a um hlaka, January chawlkar hmasatak a inthawkin February thla kar hnina vel chen an hni thei hlak. MBBS an pass chie hin Sipai Commissioned Officer ah an thang ngei ngei angai.
For details please log on to : www.afmcpune.com.
Hieng naw khawm hi India rama inchukna tha tawpkhawk pawla ngai (f) Banaras Hindu University (BHU) (www.bhu.ac.in), (g) Jawaharlal Institute of Post-graduate Medical Education and Research (JIPMER), Pondicherry, (www.jipmer.org), (h) Aligarh Muslim University (AMU), (i) Manipal Academy of Higher Education (MAHE) le Inchukna hmun dang dang hai khawmin MBBS lutna dingin Entrance kumtin an buotsai hlaka, SC/ST quota an nei vawnga, ngaiven pei chun exam thei tamtak hi a um anih.
Ei hriet zing ding chu India ramah mihriem ei pung hrat dan, damnaw enkawl ding pungpei le Medical inchuk nuom an pung hrat dan ngaituo in Medical Organisation hi MBBS inchukna hmun siem/College indin belsa tienga hin an hrat tawk naw a, mithiem hai buoipui a tling anih. Engineering Field a hin chu hitieng pang hi a hrat hle a, tulai hin India ramah BE Seat popo belkhawma hmun ruka the a hmun khat vel chau hi MBBS Seat a um phak tawk anih. Chuleiin, MBBS Seat hmu hi thil mei mei ani naw a, mi hausa lem chun a nuoi tel tak tak hin an inchawk mek anih. Eini hai ta ding chun a entrance inziek tling thei khawpa thiemna tak ei hnawt hi a tul ta takmeuh anih. A chunga ei hang tarlang pova khin (State quota tiem lovin) CBSE–AIPMT khi a Seat a tam leiin a awmnem taka ngai ania, Preliminary ah Multiple Choice Type a thai indiknaw khan Minus Marking a um a, 2006 Entrance Exam a khan ST hai bik kha 52% hmu chin chau khan Prelim an tling phak anih. Delhi, Kolkata etc. ah Class XII ( Sc.) an zo hnungin, kum inhmangin a sing tel tak meu hin Coaching an kai ani a, hi khawm hi Competition suk sang tu chu anih. Chuleiin eini tading chun ei State quota hi ngaiven inhma in thang la inla, tling awlsamna tak ala ni zing el thei anih.
2) B.E/B.Tech/B.Sc (Engg.) : Hieng hai pathum hi nina thuhmun, a College/University in a hming an buk dan zira phuok anni a, Sin/Inchukzawmna ding a chun ‘Degree in Engineering/Technology’ ti kha an advertise dan ani hlak a, a hming a inthawk hin buoi naw in la, ei hril pawl nawk nawk khawma pawinaw ah ngai ei tih. An chukna hmun le an chuk dan tlangpui:-
BE / B.Tech inchukna ding India rama hin College a tam em em a, Medical le an angnaw na tak chu Zirtirtu sin thaw tum naw hai tading chun Postgraduate (ME/M.Tech) hi a hlu bek bek ta naw a, BE hin sin tieng panga chu field/office experience hung nei peiin Post an sangtak khawm kha thlung thei anga ngai anih. Lecturer/Professor etc. nitum hai tading ruok chun ME/M.Tech (Kum khat le a chanve Course) inchuk zawm ngei ngei a ngai a, Ph. D thaw nghal thei anih. (M.Phil a um ve naw a, NET nei angai bawk nawh). India rama hin chu tuchena ME/M.Tech hi BE inchukna dinga Entrance a harsat dan le a ‘rush’ ang hi anta naw deu hlek niin an lang.
Iengtapo khawm nisien, ei subject BE/B.Tech inchukna tiengpang kha hang thlurpei tum eita: India rama hin College a tam em em a, a then chu All India Council of Technical Education (AICTE) le University Grants Commission (UGC) in a approve lem lo, private a sumdawngna dinga an indin, a degree khawm hlu bek bek lem lo dam annih. AICTE le UGC approved laia khawm Private/Trust/Society haiin an indin ve hrim hrim college tha tak tak, a degree khawm recognized vawng, admission le anchukna dinga pawisa tam deu hlek (nuoi nga a inthawka nuoi sawm) seng ngai dam anni tawl a, College thlang chungchanga fimkhur a tha hle. Chiengkuong rak lo hai hi National chanchinbu a in advertise tam tam an ni nawk nghal a.
BE/B.Tech inchukna college ah naupang sie inzirtira inzirtir thei anta naw leiin, inchukna that dan hriltu tak chu a san tamtak laia a naupanghai lekhathiem theisa an ni le ninaw a hin an nghat lien khawp el. College tha chu India rama naupang thiem vawrtawp haiin lut a, inchuk an tum deu vawng na college hai kha an nih. Engineering College tha tam tak hai hang belchieng deu tum eita (a that dan indawt ruokchu ni kher lovin) :-
a) Indian Institutes of Technology ( IITs) : (i) College chanchin :- IIT hi India rama pasari (Kanpur, Kharagpur, Delhi, Mumbai, Chennai, Roorkee, Guwahati) a um taha, khawvel inchukna insang tha a thlangsuok zakhat laia Oxford, Cambridge etc. tihai laia India ram a inthawka thangpha umsum an nih. India rama hin engineering inchukna thatak a ni el bakah degree inchukna hrim hrim hai lai popova thataka ngai pawl an tam khawp el. “In IITs you don’t go looking for jobs, the jobs come looking for you" (‘IIT a chun sin i zawng angai nawh, sinin a hung zawng lem che anih’ ati na niawm tak anih) anti hiel anih. IIT a B.Tech inchuk zo hai a zatve vel hi India rama nina insang tak tak neiin an um mek a, a zatve dang hi chu America, Europe etc a umin, a then manager, software engineer le mani a Company nei a, an sum themdawk India pawisa lem chun ei ngaituo na in a phak rak talo dam anni tawl a. An chuk zo haihin Association (Alumni Association) tha deu an indin a, vawisun hin entirna’n India sawrkar hin IIT haihi pawisa lo pe nuom ta naw sienla khawm anni’n Consultancy a an hmu le an Alumni Association hai hin tuta ngirhmun ang khu chu an in thlung tir thei hrim hrim antah.
India rama hlaw tamtieng panga insang pawl a an hril hlak IIM–Ahmedabad a khun MBA (PGDBM ani lema chu ei hriet awlsam na dingin MBA tipei lem eitih, an ang vawng thova) khu graduate hnunga kum hni inchuk ani a, kum khata Cheng nuoi 6/7 vel a inthawk a nuoi zakhat in kar vel hlaw dingin an inchuk zo hma hma in Foreign le India Company hai khun an lak fai vawng hlak anih. IIM–Ahmedabad a inchuk hai khu iengtiklai khawmin za a sawmsari engineer an ni zinga, chuong engineer hai laia za a sawmsari chu IIT a graduate an nih.
Tuta hma khan IAS/IFS a khawm hin IIT graduate hai hi India rama a topper anni deu zing hlak a, tuta Privatisation khawvel ei hmang hnunga Company/Corporation ah hlaw tam tak taka an lut ta hnung hin a thiem zuol tak tak hai hin IAS/IFS sin dittaka an nei tanaw lei khawm ani el thei a, hmun danga mi hi topper antam lemin an lang tah.
India ram ani sung chu engineering college hai lai popova iengkima chunghnung dinga siem anni leiin miin iengangin thildang kha inpakin advertise hlak haisien khawm a changkang tak tho tho ti kha ei hriet thang atih. Ei hriet pawl naw ding chu IIT hai hi multi–disciplinary Institutions (thil chi hran hran inchuk theina hmun) an nia, ME/M.Tech, M.Sc., Ph.D (Subject hran hran) le MBA khawm hi an nei deu vawng a, thildang dang hai khi tha thawkhat vieu hai sien khawm, India ramin a ngaisang bek bek chu IIT a B. ech inchukna bik khu anih. An ngaisang bek bekna sanhai laia a lientak chu a lutna dinga fe thleng ngei ngai Joint Entrance Examination (IIT-JEE) khu anih.
(ii) IIT- JEE : India rama exam harsa pawl taka ngai IIT–JEE hi kumtin vawikhat, April chawlni vawi hnina vel a hin, mi nuoi thum/nuoi li velin an exam hlaka, SC/ST tadingin PCM ah Class XII ah 55 % bek hmu angai. Class XII i pass kum (i result i hriet hma in form i buoipuia in exam angai) le a kum nawk chie an phal tah. A form, Rs 300 (SC/ST) man, hi November thla tawp velah Canara Bank hmun dang dang a an zawr tan hlaka, January kar hmasatak chen an submit thei hlak. Institute of Technology, Banaras Hindu University (IT-BHU) le Indian School of Mines, Dhanbad (ISM, Dhanbad) in an hmuna B.Tech inchukding hai lutna dingin IIT-JEE kha an hmang ve leiin, IIT pasari le hieng inchukna pahni a hin ST quota 7.5 % tiemin Seat 4000 vel a uma, tling ruok chu a harsa hle. CBSE/ICSE le State Board a Class XII (Sc) inchuklai pangngai thiem deu hlek hai khawm hin a exam hi harsa anti hle a, a tling hai hi Class XII pass hnunga kum khat chawl tawpa in buotsai baka Class XII inchuk malama Coaching Institute tha deu hlek a bei char char hai an ni nuom khawp el. Thiem tak tak Class XII zo kuma tling nghal an um khawmin a tlawm lem an ni hlak. Minus marking a um a, tuchena chu, ST chu hril lo, General tading khawma IIT–JEE ah 40% hmu chun tling ngei ngei thei ding ala nih. Inhnai deu deuvin multiple choice type question in an siem a, question hlui a suok ta ngai meu nawh. By–heart system a thaw hai nekin conceptual knowledge (chieng fek fawka hrietna) nei an zawng ani tak anih.
(iii) Inchukna Sum sengso : Sawrkar a inchukna ani leiin sengso zat ding chie hril thei naw inla khawm sengso hi chu tamtak ani nawh. B.Tech inchuk haiin sin hmuna kawnga harsatna an nei naw leiin Bank in loan an phal em em a, an insuong vena pakhat chu vawisun chen hin inziek tling pawisa harsa lei a inchuk thei naw an la um nawh ti hi anih.
b) National Institutes of Technology (NITs) :
(i) College chanchin : Tuta hma a State lien deu deuva pakhat peia an sem dar Regional Engineering College (REC) ti hlak hai kha Central Sawrkarin pawisa pesa in an thuom tha a, Kum 2000 vel khan NIT tia inbukin Central Sawrkarin thuneina popo a lo lak pumhlum vawng ta a. Tuhin NIT hi sawmpakuo (Allahabad, Bhopal, Calicut, Durgapur, Hamirpur, Jaipur, Jalandhar, Jamshedpur, Kurukshetra, Nagpur, Rourkela, Silchar, Surathkhal, Surat, Warangal, Tiruchirapalli, Patna, Srinagar le Raipur) a um mek. Tripura Engineering College, Agartala ti hlak kha NIT, Agartala ti a inlet antum mek bawk anih. NIT hai hi an rengin residential (inchuklai popo hostel a um ngei ngei ngai, puotieng/mani in a inthawka kai awi nilo) college anni a, ME/M.Tech le Ph.D thaw thei nghal na an ni deu vawng tah. College a Internet facility 24 hours pek anni vawng bawka, IIT hai thasang dawltu dinga chei le enkawl mek annih. NIT hai hi an thatdan in ang tlangpui a ngai ani a, chulai zing chun a tha bik deu hlek umin an hril. Tulai hnaia ding chun, NIT Surathkhal, Tiruchirapalli le Warangal ami hai hi a thazuol a ngai an nih. NIT thazuol hai hi hi IIT la tharlam le changtlung rak naw neka ditlem hiel khawm an um ve nawk tho anih. NIT thazuol hai le BITS, Pilani a hin seat mi pe ve ve hai sien la, thlang thiem a harsa hle ka ring .
NIT a hai hin Student pangngai taka pass (subject bat nei thang neng nung nilo) hai chu Company/Corporation hai hin 100% ( za a za ) College hmuna fein Campus Placement in an lak hlak anih. NIT a lut ding hin All India Engineering Entrance Examination (AIEEE) fe thleng ngei ngei angai anih.
(ii) AIEEE : IIT–JEE neka awmnem deu hleka ngai AIEEE hi kumtin vawikhat, April thlatawp a mi nuoi thum/nuoi li vel bawkin an exam hlaka, PCM ah Class XII pass taphawt tadingin an hawng. Class XII i pass kum (i result i hriet hma in form i buoipuia in exam angai) a inthawkin in exam thei nghal anih. A form, Rs 150 (SC/ST) man, hi December ni 15 velah Canara Bank hmun dang dang a an zawr tan hlaka, January thla tawp chen an submit thei hlak. Multiple choice type niin marking a um a, mark hmu antak hle. Full mark 540 a SC/ST tading chun 150 chung hmu pha hai chu a thaw tha pawl anni hlak. India hmarsak a Class XII (Sc) pass, SC/ST tading chun Mark 100 i hmu thei chun i tling hrim hrim a, chuleiin duam rak lova, thiem chiengpo thaw a, mark 100 le 150 inkar vel kha hmu tumsa law law khan inziektling awlsamtak dingin ka ring.
(iii) Inchukna Sum sengso : Sawrkar a inchukna ani leiin sengso hi thildang a inchukna ngaituoin atam naw hle a, hieng ang vel hi Kum 4 (li) sunga sengso anih :-
(a) Admission (hostel le inkawp vawngin) :- Rs 20,000/- vel ania, 1st semester fee a thangsa nghal bawk (vawikat chie pek angai).
(b) Semester Fee :- Rs 10,000/- vel, thlaruk danah vawi sari dang pek angai bawk.
(c) Mess Fee :- Rs 1,500 /- le 2,000 inkar, thlatin chawi angai.
(d) Lekhabu man :- Library a lekhabu a tam a, nakie tieng a dinga nei ve hrim hrim ei nuom ani naw chun SC/ST tading lem chun inchawk angai meu nawh.
c) North East Regional Institute of Science and Technology, Itanagar (NERIST) :
India hmarsak State hai Science & Technology a suk changkangtu dinga Central Sawrkar in an din anih. Sawrkar ta lieu lieu ani leiin sengso hi NIT hai le in angtlang put mei atih. B.Tech bakah Bachelor of Forestry le thil dang dang an nei sa a, an engineering inchukna chau ei thlur ding anih. A course an siem dan hai chu :- (i) Matric pass hlim a lut theina B.Tech dingin Kum 6 Course (Diploma Kum -3 le degree Kum - 3 ) (ii) Matric zova Kum thum Diploma pass ta hai tadingin B.Tech Kum – 3 course (iii) Class XII (Sc) pass hai tadingin B.Tech Kum – 4 (Diploma Kum - 2, degree kum – 2) Hieng Course chi hrang hrang a khin Seat za a sawmriet vel chu India hmarsaka permanent residents hai tadingin inzat sengin ei nei anih. A lekha thiem rak naw State hai tading chun tling a awl deu hlek ding tina anih.
NERIST a pass hai hi NIT a pass hai ang thovin Company/Corporation hai College hmuna fein Campus Placement in sin tha tak tak an pek hlek anih. NERIST hin a hranpa in Entrance an buotsai hlaka, ngaiven nuom chun www.nerist.ac.in a ngaiven chi ni’ng atih.
Ei Article a sei taluo naw na dingin College tha dang hai tawi te te in tarlang tum ei tih :-
d) Birla Institute of Technology & Science, Pilani (BITS, Pilani) :
India rama engineering College tha 10 an thlang suok pha IIT hai laia thang zing zing chu BITS, Pilani hi anih.India ramsunga Board tina Class XII (Sc) topper seng kha lut theina quota, (test ngailovin) an pek a, a bak po chun Internet ah on-line in Admission Test (BITSAT) an thaw hlak. BITSAT hi AIEEE neka tling harsa lem ania, inchuk tum tamtakin NIT hai nekin an ngaisang/dit lem. Mi pangngai tading chun tlingkawp veve chun BITS, Pilani kha pan vang vang chi anih. Foreign le India ram sunga sin thawna hmu chungchang a khawm IIT hai hi an hnawt phak deu zing anih. Sawrkar ani chie naw leiin sengso ruokchu a tam deu hlek.
e) AIEEE ring College dang hai : (i) Delhi College of Engineering (DCE ) (ii) Netaji Subhas Institute of Technology (NSIT), New Delhi : - Hieng College pahni hai hi Delhi sunga um veve India rama khawm college tha a inlang phak annih. National Capital Territory of Delhi sunga inchukna um hrim hrim a inthawka Class XII (Sc) zo hai tadingin Seat 85 % (za a sawmriet panga) an hluo thei a, chu 85 % seat hluo ding chun Common Entrance Test (CET ) kumtin an buotsai hlak. A bak 15 % chu Delhi puotieng mi, AIEEE - a a thaw tha pawl hai tadingin an sie a , Form hran thelut ngai lovin AIEEE kha anring nghal a, SC/ST tading chun AIEEE Full mark 540 ah 150 chungtieng hmu hai tadingin beisei ngam chi chau ni ‘ng atih. NIT hai nek in kumkhat sengso chu Rs 20,000/30,000 velin ato lem. Chubakah, hieng college hai (iii) Birla Institute of Technology (BIT) , Mesra, Ranchi, (iv) Indian Institute of Information Technology (IIIT), Allahabad, (v) AB Vajpayee IIIT & Management, Gwalior, (vi) Kalinga Institute of Industrial Technology (KIIT), Bhubhaneshwar, etc. a hin AIEEE a mark hmu insang pawl hai (150 chungtieng) tading chun lut thei an ni a, sengso ruok chu NIT nekin kum khata Rs. 30,000/40,000 velin ansang lem el thei. Hieng Institution dang dang hai hi NIT naran deu hai neka thalem, NIT thatak pawl le intluk thawkkhat a ngai an nih.
f) College tha dang hai : - State quota/Entrance danga lut theina College tha tak tak, NIT tha pawl le khaikhin thei an um nuol bawka, Student pass suok haiin ramsung le rampuo a sin hmu le hlawtam chungchanga le thildanga tu dang khawm an inhnar bik nawh. E.g. (i) Bengal Engineering & Science University (BESU), Shibpur, (ii) Institute of Technology, Jadavpur Unversity, (iii) PSG, Coimbatore ( iv) Anna University, Chennai le a dang dang.
(g) State Quota a College thlang thei hai. : Ei umna State seng hin Quota an nei vawnga, khawlai hmuna khawm Class XII (Sc) kha zo inla, Permanent Residents ei nina State Quota kha hni chi anih. State Capital ah Directorate of Higher & Technical Education/Higher Education/Education a hai hin ei lut tum kum April/May thla velah ngaiven chi ning atih.
A hnuoia college a hai hin State quota a inthawkin in chuk mek ani chun, taima takin inchuk la, in college neka tha kha India rama a tam chuong nawh ti hrie zing rawh, (a that dan indawt ani kher nawh) viz : (i) Jawwarharlal Nehru Technical University (JNTU), Hyderabad, (ii) College of Engineering, Thiruvananthapuram (iii) Assam Engineering College, Guwahati, (iv) Dr. B.R. Ambedkar Institute of Technology, Bangalore (v) PES College of Engineering, Mandhya, (vii) Jorhat Engineering College, Jorhat, (viii) Coimbatore Institute of Technology, Coimbatore etc etc..
Khi a chunga ei hril ta hai baka khin State quota a fe theina College tha deu deu tamtak a la uma, amiruokchu, fimkhur deu hlek ngai chu tulai hin State Quota ti siin Private College-ah (a degree lem chu recognized vawng ani) Student an thawn ta nuol a, State quota a fe hai Admission le Inchukna Fee insang tak tak ahma a hrietlawk na um lova chawi ngai hi a um zeu zeu ta leiin, Seat an mi pek chie khan a College ei hmelhriet zawng ani naw chun, telephone a hai Student umsa/a khawpuia a um hrim hrim awm indawn dawk a, a College chanchin hriet chieng hmasak phawt a tha.
KHAIKHAWMNA : A chung a ei thil ziek a inthawk a inlang hai chu :-
(i) Naupangin Clas XII (Sc) Final a exam kum, a la pass hma si hin, Entrance a ziek an phal vawng a, Class XII an chuk kum, kumtawp tieng October/November vela inthawkin a kumnawk March/April thla vel chen Form buoipui deu zing a ngai. Professional a fe nuom si, Class XII pass phawt nghak te te hai chun kum khat an pei nuom khawp el.. (ii) Professional Course a fe dingin Class XII (Sc) marks basis a lutna a vang hle a, Entrance ani tho tho leiin, pass tho ding mark hmu that inring naw leia exam bansan (Dropped) hi chingnaw a tha. (iii) Mi rethei tading chun a thei sung po chu Sawrkar Institution ah inchuk thei inla a tha. Mani sum nei le sengthei dan ngaituo zingin inchuk ding course le inchukna hmun thlangthiem a tha. Sawrkar sinthaw tading lem chun hiengang an thlung huna an hmang ding inkhawl hi tha vieu a tih.
(iv) Private/Trust etc in an indin College hai hi a Admission le an chukpeina a pawisa seng tamtak, a lutna ding khawm entrance ngailo, chanchinbu a in advertise rak rak bawksi hai hlem a um hi ti a um hle.
(v) Hieng College ei ziek hai popo khi a that le that naw chu a chuk pa/nu chunga an nghat lien tak. A tawp taka chu an chuktupa/chuktunu tak khan taimakna, indikna, tumruna hai Pathien ringtu nun indiktak an chuksuokna College le Course bak a tha a um nawh ti kha ei hriet zing dinga ka thucha nuhnung anih.
( Hi article ziektu Pu Zosanglien Zote hi Diger Compound, Cachar, Assam a pieng ani a; 1985 khan D.M. College of Science, Imphal a inthawka BSc. a zo hnungin 1990 khan Regional Engineering College (tuta NIT), Silchar a inthawkin BE (Civil) a zova. 1990 ah Mizoram PWD hnuoia Assistant Engineer SDO sin a thaw tan a, vawisun chen hin ala thaw mek. Basic Mual , Ramhlun North, Aizawl ah khawsain a be nuom hai tadingin : Ph (0389) 234 2832, 9436141081 (M), e-mail : zosanga.zote@rediffmail.com.)Labels: Articles |
posted by Joyful Thiek @ 3:47 PM   |
|
|
|
|
|
